Հանդիպում Օդեսայի մարզային պետական վարչակազմի ղեկավար Մաքսիմ Կուցիյի և Օդեսայի քաղաքապետ Գենադի Տրուխանովի հետ

02 դեկտեմբերի, 2019

Գլխավոր հանձնակատար Զարեհ Սինանյանը, Ուկրաինայում ՀՀ արտակարգ և լիազոր դեսպան Տիգրան Սեյրանյանը և Օդեսայում ՀՀ գլխավոր հյուպատոս Գևորգ Պետրոսյանը հանդիպել են Օդեսայի մարզային պետական վարչակազմի ղեկավար Մաքսիմ Կուցիյի հետ: Շնորհավորելով նրան պաշտոնը ստանձնելու առթիվ` հանձնակատարը կարևորել է հայ-ուկրաինական հարաբերությունների սերտացումն ու զարգացումը, միևնույն ժամանակ նշել, որ Ուկրաինայի հայ համայնքը, այդ թվում Օդեսայի հայությունը, լիովին ինտեգրված են երկրի կյանքի տարբեր ոլորտներում, ակտիվ են բոլոր բնագավառներում: Ըստ Զարեհ Սինանյանի` սա ապացուցում է Ուկրաինա պետության հյուրընկալությունն ու բարյացակամ վերաբերմունքը հայերի հանդեպ: Մաքսիմ Կուցիյն իր խոսքում հայ համայնքին մշտապես աջակցելու պատրաստակամություն է հայտնել:

Այնուհետ տեղի է ունեցել հանդիպում Օդեսայի քաղաքապետ Գենադի Տրուխանովի հետ: Վերջինս նշել է, որ քաղաքն առանձնանում է իր բազմազգ բնակչությամբ, նաև խաղաղ համակեցությամբ: Քաղաքապետն ընդգծել է նաև Օդեսայի և Երևանի միջև առկա միջհամայնքային հարաբերություններն ու դրանց զարգացման հեռանկարները: Գենադի Տրուխանովը շեշտել է, որ տեղի հայ համայնքը հարգված է, առանձնանում է իր մշակույթով, հավատով և եկեղեցով, քաղաքի այցելուներին գերող հայկական այգիով: Հանդիպման ավարտին Զարեհ Սինանյանը նշել է, որ Ուկրաինայի հայ համայնքը սիրում է իր բնակության երկիրը, այն համարում է իր տունը, հայրենիքը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր