Մեծ Եղեռնի հիշատակին նվիրված միջոցառում

24 ապրիլի, 2019

Ս.թ. ապրիլի 24-ին Օդեսայում Սբ. Գրիգոր Լուսավորիչ եկեղեցու բակում գտնվող Հայոց Մեծ Եղեռնի զոհերի հիշատակին նվիրված խաչքարի մոտ կազմակերպվեց Հայոց ցեղասպանության 104-րդ տարելիցին նվիրված հիշատակի արարողություն:

Հիշատակի սրբոց կարգ մատուցվեց Օդեսայի Հայ առաքելական եկեղեցու հոգևոր հովիվ Տեր-Աբգար Քելեջյանի կողմից:

Միջոցառմանը ներկա էին Օդեսայում ՀՀ գլխավոր հյուպատոս Գևորգ Պետրոսյանը, Օդեսայի հայ համայնքի նախագահ Սամվել Տիգրանյանը, Օդեսայի մարզային խորհրդի պատգամավորներ, ուկրաինահայեր: Ներկաները ծաղիկներ խոնարհեցին Հայոց ցեղասպանության անմեղ զոհերի հիշատակի հուշարձանին, որից հետո տեղի ունեցավ մոմավառություն:

Միջոցառմանը ելույթ ունեցավ Գ.Պետրոսյանը՝ նշելով, որ ցեղասպանությունը մարդկության դեմ ուղղված լուրջ հանցագործություն է, որը դատապարտվում է միջազգային հանրության կողմից: Ցեղասպանության ժխտումը ոչ միյան ցեղասպանության ենթարկված ազգի իրավունքների և արժանապատվության խախտում է, այլ խաթարում է միջազգային իրավունքի և համամարդկային բարոյականության հիմքերը, խոչընդոտում է ազգերի և ժողովուրդների միջև հարաբերություններին: Հյուպատոսը կարևորեց, որ ցեղասպանության դեմ միջազգային պայքարը մեր արտաքին քաղաքականության անբաժանելի մասն է կազմում: Ոչինչ չի մոռացվել, և մեր կարգախոսն է՝ «Հիշում եմ և պահանջում»:

Այնուհետև, Օդեսայի հայ երիտասարդների կողմից կազմակերպվեց ֆլեշմոբ, որից հետո Հայկական մշակույթի կենտրոնում բեմադրվեց ներկայացում՝ կազմակերպված Օդեսայի կիրակնօրյա դպրոցի կողմից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր